முஸ்னது அஹ்மத்

இறைத்தூதர் இஸ்மாயீல் (அலை) அவர்களின் பரம்பரையில் இமாம் அஹ்மத் பின் ஹன்பல் பின் ஹிலால் பின் அசத் (ரஹ்) அவர்கள், ஹி: 164 (கி.பி. 780)இல் துர்க்மானிஸ்தானில் உள்ள ‘மர்வ்’ எனும் ஊரில் பிறந்தார்கள். பின்னர் தாயாருடன் இராக் தலைநகர் பஃக்தாதில் குடியேறினார்கள். அன்னார் ஓர் அநாதை. குழந்தைப் பருவத்திலேயே தந்தையை இழந்துவிட்டார்கள்.

தொடக்கக் கல்வியை பஃக்தாதில் தொடங்கி, திருக்குர்ஆனை மனனம் செய்த இமாம் அவர்கள், நபிமொழிகள் சிலவற்றை இமாம் அபூயூசுஃப், ஹுஷைம் பின் பஷீர் (ரஹ்) ஆகியோரிடம் கற்றார்கள். பின்னர் அங்கிருந்து புறப்பட்டு பஸ்ரா, கூஃபா, திருமக்கா, யமன், எகிப்து, அர்ரய்யு முதலான நகரங்கள் சென்று அங்கிருந்த பெரும் அறிஞர்களிடம் கல்வி கற்றார்கள்.

இவ்வகையில் அரபி மொழி, நபிமொழி, அறிவிப்பாளர் தர ஆய்வியல், அறிவிப்புகளில் உள்ள மறைவான குறைகள், ஷரீஆ சட்டவியல், இறையியல்… எனப் பல்துறைகளையும் கற்றுப் பல்கலை அறிஞராக விளங்கினார்கள். அன்னாருடைய ஆசிரியர்களில் சுஃப்யான் பின் உயைனா, யஹ்யா பின் சயீத் அல்கத்தான், இமாம் ஷாஃபிஈ, யஸீத் பின் ஹாரூன், வகீஉ பின் அல்ஜர்ராஹ் (ரஹ்) முதலானோர் குறிப்பிடத் தக்கவர்கள் ஆவர். இமாம் அபூஹனீஃபா (ரஹ்), இமாம் மாலிக் (ரஹ்) ஆகியோர் இமாம் அஹ்மத் பின் ஹன்பல் (ரஹ்) அவர்களின் ஆசிரியரின் ஆசிரியர்கள் ஆவர்.

இமாம் அஹ்மத் (ரஹ்) அவர்களிடமிருந்து நபிமொழிகளை அறிவித்தோரில் பழம்பெரும் அறிஞர்கள் அடங்குவர். ஆதாரபூர்வமான ஆறு நபிமொழித் தொகுப்பாசிரியர்களில், இமாம் புகாரீ (ரஹ்), இமாம் முஸ்லிம் (ரஹ்), இமாம் அபூதாவூத் (ரஹ்) ஆகியோர் அன்னாரிடமிருந்து ஹதீஸ்களை அறிவித்த நேரடி மாணவர்கள் ஆவர். மற்ற மூவரான இமாம் திர்மிதீ (ரஹ்), இமாம் நஸயீ (ரஹ்), இமாம் இப்னுமாஜா (ரஹ்) ஆகியோர் அன்னாரின் மாணவரின் மாணவர்கள் ஆவர். இஃதன்றி ஹதீஸ் பகுப்பாய்வுக் கலை வல்லுனர் இமாம் யஹ்யா பின் மயீன் (ரஹ்) அவர்களும் அன்னாரின் பிரதான மாணவர்களில் ஒருவர் ஆவார்.

இறை வழிபாடு, நபிவழி நடத்தல், பற்றற்ற வாழ்க்கை, கொள்கைப் பிடிப்பு, அறச் சீற்றம், கடின உழைப்பு எனத் தம் வாழ்வையே தவ வாழ்வாகக் கழித்தவர் இமாம் அஹ்மத் (ரஹ்) அவர்கள்.
கடுமையான வறுமையிலும் தன்மானத்தோடும் கௌரவத்தோடும் வாழ்ந்து வழிகாட்டிய இமாம் அவர்கள் ஹிஜ்ரீ 241 (கி.பி. 855)இல் பஃக்தாதில் தமது 75ஆவது வயதில் மறைந்தார்கள்.